Gipalig-on sa mga magtutudlo ug estudyante sa Alternative Learning System (ALS) sa Mawab District ang ilang kahibalo ug kahanas sa pag-atubang sa mga medical emergency pinaagi sa gipahigayong Medical Emergency Management Training. Tumong sa maong kalihokan nga hatagan ang mga partisipante og praktikal nga kahibalo ug pagbansay kung unsaon pagtabang ug pagtubag sa mga sitwasyon nga nagkinahanglan og dali nga medikal nga pag-atiman.
Gipasalamatan sa mga organisador si Mawab Mayor Myrill Apit sa iyang suporta, lakip ang paghatag og bugas ug pagpahigayon og raffle alang sa mga ALS learners. Giila usab ang Municipal Social Welfare and Development Office (MSWDO) nga gipangulohan ni Lucky Joy Yabana, ug ang Municipal Disaster Risk Reduction and Management Office (MDRRMO) sa ilang kontribusyon sa maong kalihokan.
Gilauman nga pinaagi sa maong pagbansay, mas maandam ang mga ALS teachers ug learners sa pagtabang sa isigkatawo panahon sa mga emerhensiya, diin matag segundo importante sa pagluwas sa kinabuhi.










