Gihatag na ni Davao de Oro Governor Engr. Raul “RM” Mabanglo ang 3rd Quarter Honorarium alang sa 456 ka barangay functionaries sa lungsod sa Nabunturan atol sa seremonyas nga gipahigayon sa Kapitolyo kagahapon, lakip ang turnover sa mga tseke ngadto sa 28 ka Barangay Captains ubos sa Bawat Barangay Makikinabang Program o BBMP.
Lakip sa nakadawat sa honorarium nga adunay dugang nga kantidad ang mga KKP, Barangay Health Workers (BHW), Barangay Nutrition Scholars (BNS), SWADA ug Watershed Guards.
Kahibaloan nga ang matag barangay kapitan nakadawat usab og ₱200,000, diin ang ₱100,000 igahin alang sa prayoridad nga proyekto sa barangay, samtang ang laing ₱100,000 gamiton isip scholarship assistance sa lima ka graduating students nga matag usa makadawat og ₱20,000.
Sa kinatibuk-an, mokabat sa 140 ka graduating students sa Nabunturan Davao De Oro ang makabenepisyo sa maong scholarship assistance.
Gilauman nga pinaagi sa maong programa, mapadayon ang suporta sa mga barangay functionaries ug mga estudyante, ingon man ang pagpatuman sa mga prayoridad nga proyekto alang sa kalamboan sa matag barangay.










