Duha ka lalaki nga giilang High-Value Target o HVT ang nadakpan sa buy-bust operation sa mga otoridad sa F.S. Fajares Avenue, Barangay San Jose, Pagadian City, pasado alas dose sa udto niadtong Nobyembre 19, 2026. Giila ang mga suspek sa alyas nga “Abdul,” 34 anyos, ug alyas “Dani,” 36 anyos, nga parehas residente sa Barangay Kawit ning dakbayan sa Pagadian.
Narekober sa operasyon ang gibana-banang 350 gramos nga gituohang shabu nga nagkantidad og P595,000 ka pesos, lakip nakuha usab ang duha ka sakyanan, cellphone, mga bag ug unom ka boodle money.
Gipangunahan sa PDEA Zamboanga del Sur Provincial Office ang operasyon, kauban ang nagkadaiyang yunit sa PNP, Philippine Coast Guard ug Regional Mobile Force Battalion 9. Gi-alegar nga naglapas ang duha sa Section 5, Article II sa Republic Act 9165 o Comprehensive Dangerous Drugs Act of 2002.
Gikustodiya na sa mga otoridad ang mga suspek ug mga ebidensiya alang sa dokumentasyon ug tukmang legal nga proseso.










