Nadakpan ang usa ka 20-anyos nga babaye atol sa gikasa nga buy-bust operation sa Purok 1, Barangay Bualan, Kumalarang, Zamboanga del Sur, mga alas 11:15 sa gabii, Nobyembre 18. Ang nadakpan nga suspek residente sa lungsod sa Lapuyan ug bag-o pa lamang nga nailhan sa kapulisan isip Street-Level Individual (SLI).
Gikasa ang operasyon sa mga personahe sa Kumalarang Municipal Police Station, sa koordinasyon sa Philippine Drug Enforcement Agency (PDEA) Region 9. Na-recover gikan sa suspek ang usa ka medium-sized sachet nga gituohang shabu, buy-bust money, cellphone ug usa ka Suzuki Raider 150 nga motorsiklo.
Gidala na ang babaye ug ang mga nakumpiskang ebidensya sa Kumalarang Municipal Police Station alang sa hustong dokumentasyon ug disposisyon. Samtang, isubmitar sa Zamboanga del Sur Provincial Forensic Unit ang nakumpiskang gidudahang iligal nga droga alang sa forensic examination.
Photo courtesy:Flickr










