Mikabat sa 617 ka pamilya sa Barangay Katipunan, New Bataan, Davao de Oro ang nakadawat og tag-lima ka kilos nga bugas isip kabahin sa selebrasyon sa ika-35 nga Araw ng Barangay niadtong Nobyembre 19, 2026.
Gikan sa lokal nga panggamhanan ang gipang-apod-apod nga bugas, diin naghatag usab kini og 10 mil pesos nga dugang pahalipay alang sa maong selebrasyon.
Mitambong usab isip keynote speaker si Senior Board Member Kol Herv Zamora Apsay ug naghatag og lima ka libo ka pesos nga cash gift. Dugang nga papremyo ang gihatag usab pinaagi sa suporta nila Governor Raul Mabanglo ug Congresswoman Maricar Zamora-Mabanglo, nga gi-representahan ni Sir Jun Tuyor.
Gipatin-aw usab ni Mayor Atty. Bianca Cualing-Brua nga bisan pa sa paningkamot sa mga residente nga mag-andam og pagkaon alang sa ilang panagtapok, gipili gihapon sa lokal nga panggamhanan nga hatagan ang matag pamilya og bugas aron adunay madala pauli.









