Gipalig-on sa San Carlos City ang kampanya batok ilegal nga droga pinaagi sa pagbansay sa mga lider sa kabatan-onan ug estudyante aron mahimong tigpasiugda sa pagpugong sa pag-abuso sa droga sa ilang mga komunidad.
Gipahigayon sa San Carlos City Anti-Drug Abuse Council (SCCADAC) ug Philippine Drug Enforcement Agency–Negros Island Region (PDEA-NIR) ang duha ka adlaw nga Training of Trainers niadtong Nobyembre 18 hangtod 19 sa City Hall Annex Building.
Mitambong ang mga representante sa Sangguniang Kabataan gikan sa 18 ka barangay ug mga lider-estudyante gikan sa nagkadaiyang kolehiyo sa siyudad.
Gitudloan sila bahin sa mga matang ug epekto sa droga, Republic Act 9165, drug abuse prevention ug rehabilitasyon aron mas mapalapad ang kahibalo ug partisipasyon sa komunidad.
Gipasiugda ni Vice Mayor Christopher Paul Carmona nga dili lamang pagdakop sa mga nalambigit sa droga ang kampanya, kondili importante usab ang edukasyon, pagpugong ug rehabilitasyon.
Giawhag niya ang mga partisipante nga gamiton ang ilang nakat-onan sa pagpalig-on sa kampanya alang sa usa ka luwas ug drug-free nga San Carlos City.
Photo courtesy: San Carlos City, Neg. Occ. -LGU Information Page










