Padayon nga naghatag og libreng castration o kapon services ang Local Government Unit (LGU) sa Bislig City pinaagi sa City Veterinary Services Office (CVSO) alang sa mga lalaki nga iro ug iring matag Miyerkules, kutob adunay pay suplay sa veterinary medicines ug biologics.
Ang maong programa gipatuman subay sa Memorandum Order No. 2026-771 nga gipagawas ni Bislig City Mayor Florencio C. Garay niadtong Oktubre 8, 2026.
Tumong sa maong programa nga makontrol ang nagkadaghang populasyon sa mga latagaw nga hayop, mapugngan ang dili planadong pagpanganak sa mga binuhi ug mapalig-on ang kampanya batok sa rabies.
Mitambong usab isip saksi sa gipahigayong mass castration si City Administrator Engr. Romulo C. Garay, diin iyang gipasiugda nga tumong sa kasamtangang administrasyon nga matabangan ang mga pet owner ug animal advocates nga makapahimulos sa gikinahanglang serbisyong beterinaryo nga dili na kinahanglan mogasto og dako alang sa operasyon.
Giawhag usab ang mga pet owners nga pahimuslan ang maong libreng serbisyo isip kabahin sa responsableng pag-atiman sa mga iro ug iring ug pagpanalipod sa kahimsog sa komunidad.
Photo courtesy: City Government of Bislig










