Nadakpan sa buy-bust operation sa kapulisan ang usa ka gidudahang nalambigit sa ilegal nga droga ug nakumpiskahan og gituohang shabu nga nagkantidad og P23,596 sa Barangay 1, San Francisco, Agusan del Sur, pasado alas-10:35 sa gabii niadtong Nobyembre 15, 2026.
Gipahigayon ang operasyon sa Drug Enforcement Unit sa San Francisco Municipal Police Station (SFMPS), sa koordinasyon sa Philippine Drug Enforcement Agency (PDEA) – Agusan del Sur Provincial Office.
Narekober sa operasyon ang siyam ka heat-sealed transparent plastic sachet nga adunay gituohang shabu, nga may kinatibuk-ang gibug-aton nga 3.47 gramos ug standard drug price nga P23,596.
Narekober usab ang upat kabuok nga aluminum foil, P1,000 nga buy-bust money, usa ka iTel Android cellphone, duha ka gagmayng plastic canister, usa ka metal canister, identification card ug usa ka Euro nga motorsiklo nga walay nakakabit nga plaka.
Gipahibalo usab sa suspek ang iyang mga katungod subay sa Miranda Doctrine ug Anti-Torture Act sa wala pa gidala sa San Francisco MPS alang sa dokumentasyon, imbestigasyon ug hustong disposisyon.
Photo courtesy: PNP San Francisco Municipal Police Station










