Narekober sa kapolisan ang 508 ka punoan sa hingkod nga marijuana nga nagkantidad og ₱101,600 atol sa hiniusang anti-illegal drug operation sa bukirong bahin sa Sitio Umbawan, Barangay Managok, Malaybalay City, kagahapon, Nobyembre 17, 2026.
Gipahigayon ang maong operasyon sa mga operatiba sa 1st Bukidnon Provincial Mobile Force Company, Malaybalay City Police Station, ug Bukidnon Provincial Intelligence Unit.
Sa eksklusibong pakighinabi sa Juander Radyo Malaybalay, gipadayag ni Barangay Kagawad Jerry Billones, ang nagdumala sa Peace and Order sa barangay, nga sila mismo ang mitaho sa kapolisan kalabot sa presensya sa gidudahang plantasyon sa marijuana, hinungdan nga girespondehan kini sa mga otoridad ug gilayong gipang-ibot ang mga hingkod nga tanom lakip ang mga semilya niini.
Walay nadakpan nga suspetsado atol sa operasyon, samtang nagdala na ang kapolisan og mga sampol sa marijuana ngadto sa Bukidnon Provincial Forensic Unit alang sa laboratory examination.
Photo courtesy: Malaybalay CPS










