Nasikop ang usa ka giingong street-level drug pusher ug nasakmit gikan kaniya ang gibanabanang ₱68,000 nga balor sa gituohang shabu ug usa ka pusil nga walay lisensiya atol sa buy-bust operation sa Barangay Karaos, niadtong Oktubre 23, 2026 sa gabii. Giila ang suspek sa alyas nga “Richard,” 47 anyos, ug residente sa Purok 7, Barangay Alegria, San Francisco, Agusan del Sur.
Gipahigayon ang operasyon pasado alas 10:22 sa gabii sa Purok 2, Barangay Karaos, sa mga personahe sa Drug Enforcement Unit (DEU) sa San Francisco Municipal Police Station, ubos sa pagpangulo ni PMAJ Carmelo D. Malubay, ACOP, ug sa koordinasyon sa Philippine Drug Enforcement Agency–Agusan del Sur Provincial Office (PDEA-ADSPO).
Narekober gikan sa suspek ang duha ka heat-sealed transparent plastic sachet nga adunay gituohang shabu ug adunay gibana-banang gibug-aton nga 10 gramos ug standard drug price nga ₱68,000.
Narekober usab ang usa ka caliber .45 nga pistola nga walay serial number, usa ka magasin ug pito ka bala sa maong kalibre.
Lakip usab sa mga ebidensiya ang usa ka ₱1,000 nga nga kuwarta nga gigamit isip marked money, pito kabuok nga boodle money, usa ka Android cellphone nga VIVO ang brand, ug usa ka Toyota Vios nga sedan.
Human sa pagkadakop, gipahibalo sa suspek ang iyang mga katungod ubos sa Miranda Doctrine ug gihatagan usab og pahimangno batok sa torture. Gidala siya sa estasyon sa kapulisan alang sa hustong proseso, dokumentasyon ug dugang nga imbestigasyon.
Samtang, giandam na sa case investigator ang tukmang mga kasong ipasaka batok sa suspek tungod sa giingong paglapas sa Republic Act No. 9165 o Comprehensive Dangerous Drugs Act of 2002 ug Republic Act No. 10591 o Comprehensive Firearms and Ammunition Regulation Act.
