Naangkon na sa pamilya ni Quennie Grace Arong, 17 anyos, ang dugay nang gipaabot nga hustisya. Gihukman nga guilty beyond reasonable doubt ang suspek nga naila isip alyas “Jason” niadtong Oktubre 7, 2026 atol sa promulgation sa korte, ubos sa pagdumala ni Judge Jimmy B. Boco.
Sumala sa pakighinabi sa Juander Radyo Tagum News Team kang kanhing Tagum City Police Station Chief, PLtCol Wildemar Tiu, orihinal nga Murder ang gisang-at nga kaso batok sa suspek. Apan atol sa promulgation, kini gipaubos ngadto sa Homicide, nga adunay silot nga 10 hangtod 14 ka tuig nga pagkabilanggo.
Nahinumdoman nga ang biktima gikatahang nawala niadtong tuig 2020. Kapin sa tulo ka tuig ang milabay, ang iyang mga patayng bukog nakaplagan sa kilid sa usa ka boarding house sa Barangay Apokon, Tagum City, niadtong Hulyo 24, 2024.
Dako nga tabang sa pagpasaka sa kaso ang mga nakolektang ebidensya — lakip ang mga pahayag sa mga testigo nga mitudlo sa suspek isip kataposang kauban sa biktima sa wala pa kini mawala. Lakip usab sa ebidensya ang towalya nga giputos sa lawas sa biktima, nga gipamatud-an nga iya sa suspek. Gikumpirma usab sa inahan ni Quennie ang mga personal nga gamit nga nakit-an uban sa mga bukog sa iyang anak.
Ang suspek gidakop pinaagi sa warrant of arrest nga gipagawas sa korte, ug nasakmit sa mga sakop sa Asuncion PNP, Davao del Norte niadtong Hunyo 1, 2026.
Alang kang PLtCol Tiu, ang desisyon sa korte dili lamang kadaugan sa pamilya ni Quennie, kondili usa usab ka dakong kalampusan sa Tagum City Police Station — pamatuod sa ilang padayon nga paningkamot nga masulbad ang mga krimen ug mahatagan og hustisya ang mga biktima ug ilang pamilya.
