Gipangayoan og dinaliang teknikal nga inspeksyon ang bag-ong natukod nga evacuation center nga nagkantidad og P9.75 milyon sa Barangay Esperanza, Carmen, Surigao del Sur, human natumba ang pipila ka bahin sa metal cladding niini sa wala pa kini pormal nga giturn-over.
Nag viral ang maong panghitabo human gi post sa residente nga si Angel Montenegro Daray ang video nga nagpakita sa mga metal panel sa gawas nga natangtang ug nahugno.
Matod ni Daray, nga nagpuyo atbang mismo sa lugar sa proyekto, nahitabo ang insidente sayo sa kabuntagon niadtong Domingo.
Gipadayag usab niya nga wala nakasinati ug daot nga panahon o linog ang maong lugar sa dihang nahitabo ang pagkahugno sa pipila ka bahin sa exterior cladding.
Tungod niini, nanawagan ang mga hingtungdan alang sa dinaliang teknikal nga pag-audit aron masuta ang kahimtang sa konstruksyon, ang kalidad sa mga materyales nga gigamit ug ang posibleng hinungdan sa pagkahugno.
Sa pagkakaron, gikinahanglan pa ang resulta sa teknikal nga inspeksyon aron matino kung adunay depekto sa konstruksyon ug kung kinsa ang posibleng adunay responsibilidad sa maong insidente.
Photo courtesy:Angel Montenegro Daray
