Gisusi sa Office of Civil Defense–Negros Island Region (OCD NIR) ang disaster risk reduction and management (DRRM) practices sa San Carlos City atol sa institutional learning and familiarization activity niadtong Agosto 24.
Kabahin sa selebrasyon sa 72nd Anniversary sa Office of Civil Defense ang maong kalihokan, diin gitumong sa OCD NIR nga masuta ang epektibong mga polisiya ug pamaagi sa siyudad sa pagpangandam ug pagtubag sa mga kalamidad.
Gilibot sa delegasyon ang mga barangay sa Prosperidad, Codcod, Quezon, Ermita, ug San Juan sa Sipaway Island aron masuta ang pagpatuman sa DRRM programs sa lebel sa barangay.
Gisusi usab sa grupo ang modernong Emergency Operations Center (EOC) sa siyudad ug ang mga teknolohiya niini nga nagsuporta sa disaster preparedness ug response.
Niadtong 2021, gipataas ngadto sa full-fledged department ang San Carlos City DRRMO pinaagi sa city ordinance, nga nakapalig-on sa institusyonalisasyon sa DRRM sa lokal nga kagamhanan.
Gipasalamatan sa OCD NIR ang City Government of San Carlos ug City DRRMO sa pagpaambit sa ilang mga pamaagi ug kasinatian sa pagdumala sa kalamidad.
Photo Courtesy: Civil Defense Negros Island Region
