Gipahigayon ang State of the Town Address (SOTA) 2026 ni Sto. Tomas mayor Roland S. Dejesica niadtong nakalabay nga adlaw, diin usa ka higayon nga nagkatigom ang katawhan sa lungsod aron maminaw sa gipaabot sa amahan sa lungsod nga mga nabuhat nga kalampusan sa iyang ika-duhang termino diin nagpakita sa padayon nga kalambuan ug pag-uswag sa lungsod sa Santo Tomas probinsya sa Davao del Norte.
Gihatod ni Dejesica pinaagi sa usa ka Video Presentation diin nadungog ug nakita sa publiko ang mga programa, proyekto ug mga aktibidad nga nahimo sa Administrasyon.
Gipakita niini ang kalampusan sa natad sa Pinansyal nga bahin, mga imprastruktura, mga serbisyo pang ekonomiya, Social ug Health services, ug pag atiman sa sector sa mga kabatan-unan, ug ang Edukasyon.
Nakatutok sa mantra sa mayor nga “Katawhan Ang Una” ang maong presentasyon, diin naghatag og klaro nga mensahe nga ang katawhan mao ang sentro sa tanang kalihokan, programa, ug proyekto, nga nagpasabot usab nga ang kalambuan dili lamang sukdanan sa mga natukod nga mga pasilidad apan sa kalidad sa kinabuhi sa mga lumulupyo.
Ang SOTA 2026 nagtimaan sa padayon nga serbisyo sa ikaduhang termino ni mayor Dejesica, nga naghatag ug paglaum ug inspirasyon sa katawhan nga magtinabangay sa pag-angkon sa mas maayong kaugmaon.
