Naglaom si Department of Energy (DOE) Secretary Sharon Garin nga magamit na sa labing daling panahon ang Malampaya East-1 (MAE-1) aron makatabang sa nagkagrabe nga oil crisis sa nasud.
Sa mga interview kang Sec. Garin bahin sa posibilidad nga magamit dayon ang bag-ong nadiskubre nga gas reserve kung molungtad pa og pipila ka bulan ang giyera sa Middle East, matod sa kalihim nga naglaom siya nga mahimo kini sa kagamhanan ug sa mga pribadong investor, ilabi na nga maayo ang dagan sa halapad nga exploration ug development sa Malampaya Gas Field.
Gipasabot ni Garin nga nagsilbing proteksyon sa oil industry sa Pilipinas ang Malampaya tungod kay aduna na kini lokal nga reserba ug dili na kinahanglang mopalit o mo-angkat gikan sa mga oil-producing countries.
Bisan pa niana, giklaro niya nga dili pa segurado kung mahimo ba kining haom sa energy mix sa nasud tungod kay kinahanglan pa nga ayuhon ang tanang teknikal nga isyu may kalabutan niini.
Taliwala niini, nakig-alayon na usab ang kagamhanan sa mga investor sa nahisgutang gas field aron tun-an kung mahimo pa ba nga paspasan ang proseso aron hingpit nga magamit ang bag-ong nakit-an nga reserba.
Niadtong Enero 19, 2026, gipahibalo ni Presidente Ferdinand Marcos Jr. ang pagkadiskubre sa moabot ngadto sa 98 billion cubic feet nga natural gas sa dapit.
Sukad niadto, mas gipahugtan pa sa Armed Forces of the Philippines ang pagbantay niini, ilabi na nga duol kini sa mga teritoryo sa Pilipinas nga gi-angkon sa China. Ang Malampaya East-1 nahimutang lima ka kilometro sa sidlakan sa Malampaya Gas Field.
Photo courtesy: Philippine News Agency
