Giawhag ni Public Employment Service Office ug Public Overseas Filipino worker Desk Office Kidapawan manager Herminia Infanta ang tanang Kidapaweños nga i-ampo ang seguridad ug kaluwasan sa mga kababayan nga nagtrabaho sa Middle East, samtang nagpadayon ang tensiyon sa maong lugar.
Matod ni Infanta, adunay duha ka Overseas Filipino Workers (OFWs) nga buot mopauli sa Pilipinas apan dili pa posible tungod kay sirado ang tugpahanan sa nasod human naigo sa mga missile strikes.
Dugang pa niini nga padayon ang koordinasyon sa Philippine Overseas Labor Office (POLO) ug uban pang ahensya aron masiguro ang kaluwasan ug mahatagan og impormasyon ang mga apektadong OFWs.
Gidasig usab ni Infanta ang publiko nga mag-amping sa pagkuha og impormasyon ug magsalig lamang sa opisyal nga pahibalo gikan sa gobyerno aron malikayan ang kagubot ug kasamok.
