RANDOM DRUG TEST GIPAHIGAYON SA PNP PERSONNEL SA STO. TOMAS DAVNOR

Gipahigayon ang random drug test sa mga personnel sa Philippine National Police nga naka-assign sa Sto. Tomas Municipal Police Station, isip kabahin sa kampanya batok sa paggamit og illegal nga droga sulod sa organisasyon, Marso 11, 2026.

Ang kalihokan gipangulohan sa PNP Regional Forensic Unit 11 aron masiguro nga drug-free ang mga pulis nga nagserbisyo sa komunidad.

Kabahin sa proseso ang presensya sa mga personnel sa Scene of the Crime Operatives (SOCO) sa forensic unit nga maoy responsable sa pagdumala sa koleksyon ug pagproseso sa mga specimen sa drug testing.

Ilang gisiguro nga nasunod ang hustong pamaagi sa pagkuha sa mga sample, pag-label niini, ug pagmentinar sa chain of custody aron mapreserbar ang integridad sa resulta sa laboratory examination.

Sumala sa kapulisan, ang random drug testing kabahin sa internal cleansing program sa Philippine National Police aron mapalig-on ang disiplina ug integridad sa serbisyo publiko.

Ang bisan kinsang personnel nga makit-an nga positibo sa illegal nga droga moagi sa confirmatory test ug posibleng atubangon ang administrative nga kaso ug ubang disciplinary action.

Sa pagkakaron, wala pa’y gi-pagawas nga opisyal nga report kung adunay personnel sa Sto. Tomas Municipal Police Station nga nag-positive sa maong drug test. Padayon gihapon ang kapulisan sa pagpahigayon og susamang kalihokan aron masiguro ang propesyonalismo ug kredibilidad sa hanay sa kapulisan.