Walay nakuha nga katin-awan ang gi-set nga committee hearing sa Sangguniang Panlalawigan sa Misamis Oriental human wala mitunga ang mga dinapit nga provincial officials lakip ang treasurer, budget officer, accountant ug administrator.
Ang maong hearing gitumong unta aron hisgutan ang kontrobersiya nga naglibot sa 2026 provincial budget, human sa partial veto ni Governor Juliette Uy.
Apan tungod sa wala pagtunga sa mga opisyal nga gilauman motubag sa mga pangutana, wala dayon nahisgutan sa komitiba ang mga isyu nga may kalabutan sa pondo sa probinsya.
Dugang ni Board Member Dexter Yasay, giingon nga ang tinguha sa maong hearing mao ang paghatag og klarong katin-awan sa publiko, ilabi na sa mga budget items nga gikaingong adunay kontrobersiya.
Sa pagkakaron, gilauman nga magtakda pag-usab og laing hearing ang komitiba aron mapadayon ang paghisgot sa 2026 provincial budget sa probinsya.
Photo courtesy: Misamis Oriental Provincial Information Office
