Gidala sa ospital ang tulo ka batang lalaki sa California, Estados Unidos human giingong gihatagan og cannabis o weed gummies sa ilang substitute teacher atol sa usa ka After-School Program.
Sumala sa kaso nga gisang-at sa Los Angeles County Superior Court, giakusahan si Felicia Boyd, 59-anyos, magtutudlo sa Sierra Elementary School sa Lancaster, nga mihatag og THC-infused nga kendi sa tulo ka magsuon nga nag-edad og 8 hangtod 11-anyos.
Gibutyag sa mga ginikanan sa mga bata nga gihatag sa maestra ang gummies aron i-selebrar ang ika-walo nga birthday sa kinamaghuran.
Human mokaon sa kendi, giingong nangaluya ug nasakit ang tulo ka bata, busa dali silang gidala sa ospital aron matambalan tungod sa posibleng pagkahilo.
Tungod niini, nagpasaka og kaso ang guardian batok sa maestra, sa eskwelahan, ug sa school district tungod sa giingong pagpasagad ug kakulang sa hustong pagdumala ug pagbansay sa mga empleyado.
Photo Courtesy:Thiager
