Gikasa sa mga personahe sa Cateel Municipal Police Station sa pagpanguna nila PEMS Merfevic C. Mosqueda, MESPO ug PCPL Eugene B. Yaranon ang information and education campaign kabahin sa Republic Act No. 11930 o Anti-Online Sexual Abuse or Exploitation of Children and Anti-Child Sexual Abuse or Exploitation Materials Act, ug sa Republic Act No. 10627 o ang Anti-Bullying Act of 2013.
Ang maong kalihokan gipahigayon niadtong nakalabay nga adlaw sa San Rafael Integrated School sa Cateel, Davao Oriental.
Ang aktibidad gipasi-ugdahan sa Department of Social Welfare and Development (DSWD) ug Municipal Social Welfare and Development Office (MSWD) sa Cateel.
Tumong niini nga inisyatiba mao ang pagpataas sa kahibalo sa mga estudyante ug stakeholders mahitungod sa mga probisyon sa mga balaod ug sa kamahinungdanon sa pagpanalipod sa mga bata gikan sa tanang matang sa online exploitation ug bullying.
Ang maong kampanya kabahin sa padayong paningkamot sa kapulisan ug mga ahensya sa gobyerno aron mapalig-on ang proteksyon sa kabatan-onan ug mapalambo ang kahibalo sa komunidad batok sa krimen nga makaapekto sa mga bata.
