Gi-awhag ni Insp. Bomen T. Lofranco, ang acting City Fire Marshal sa BFP-Tandag, ang tanang Tandaganon nga seryosong mosunod ug mo-obserbar sa Fire Prevention Month karong bulana.
Gitinguha sa opisyal nga walay matala nga bisan unsang insidente sa sunog dinhi sa dakbayan sa Tandag, dili lang karong Marso kundi sa tanang higayon, pinaagi sa pagpabiling alerto sa mga katawhan aron malikayan ang nahisgotang insidente.
Gidugang pa ni Lofranco nga sagad mosaka ang kaso sa sunog ning bulana tungod kay mao kini ang pagsugod sa panahon sa ting-init o summer season, hinungdan nga gilaoman niya ang publiko nga mahimong mas magbinantayon kalabot na sa ilang seguridad.
Alayon niini, gipahigayon ang usa ka motorcade sa tibuok dakbayan isip official kick-off ceremony sa BFP-Tandag diin naglibot-suroy ang mga fire trucks sa mga dagkong opisina ug mga establisyemento sa dakbayn.
