Nagpasidaan ang Philippine Ports Authority (PPA) nga posibleng mosaka ang freight costs sa Pilipinas tungod sa tensyon ug gubat sa Middle East, labi na sa Strait of Hormuz nga ruta sa daghang oil shipments.
Giingon ni PPA General Manager Jay Santiago nga apektado ang Pilipinas sa supply disruptions gikan sa Iran, nga nag-atake sa mga barko isip retaliatory moves sa coordinated offensive sa US ug Israel. Ang epekto niini posibleng mopataas sa bunker costs ug freight rates, ug makapakunhod sa cargo throughput sa domestic ports.
Gipahinumduman ni Santiago nga taas na ang shipping costs sa Pilipinas kumpara sa uban nga Southeast Asian countries, nga nag-average og $5,300 kada container. Posibleng mosaka pa kini og 50% hangtod 250% depende sa regional imbalances ug mga surcharge sa logistics.
Giingon usab niya nga ang import-dependent nga ekonomiya sa nasud, labi na sa fuel, construction materials, ug raw materials, maapektuhan sa mas taas nga transport costs. Sa miaging tuig, nakarekord ang PPA og 307.64 milyon metric tons nga cargo throughput ug Php30.09 billion nga revenue, apan ang padayon nga tensyon sa Middle East posibleng makapugong sa dugang pagtaas sa cargo volume ug import activities hangtod masulbad ang sitwasyon sa Strait of Hormuz.
Photo Courtesy: Inquirer.net
