Hugot nga gipatuman sa Public Service Division (PSD) sa Dakbayan sa Iligan ang polisiya nga no segregation, no collection sa mga barangay nga dili na apektado sa baha. Sumala kang PSD Head Aldwin Cabornay, gikinahanglan ang aktibong kooperasyon sa matag panimalay aron masiguro ang hapsay ug sistematikong paghipos ug pagkolekta sa basura.
Nagpadayon ang clearing operations sa mga Barangay Mahayahay, Tambacan ug Poblacion, diin ginahimo sa PSD ang hiniusang paghakot sa mga basura nga gilimpyohan sa mga residente gikan sa ilang kabalayan. Bisan og una nang nahinloan ang pipila ka lugar human sa baha, adunay nadugang nga flood waste tungod sa padayong pagpanglimpyo sa komunidad.
Matud pa sa PSD, ilang gitutokan ang mga lugar nga nagkinahanglan og gagmay nga equipment alang sa mas episyenteng paglimpyo. Apan sa pipila ka mga piot nga eskinita nga dili masudlan sa mga sakyanan ug bug-at nga ekipo, mano-manong paghakot ang gihimo aron masiguro nga walay mahabiling lapok ug debris.
Gipadayon usab ang flushing sa mga dalan nga dili na barado ang drainage system, samtang aktibo ang de-clogging operations sa mga lutsanan nga napuno og lapok. Sa Barangay Tambacan, gikonsentra ang clearing lakip ang paghakot sa flood waste gikan sa dapit sa barangay hall padulong sa tulay aron hingpit nga mahinloan ang maong lugar.
Nanawagan ang PSD sa tanang barangay nga magtinabangay sa hustong pagdumala sa basura aron malikayan ang pagbalik sa problema sa pagbaha, ilabi na kung mag-ulan pag-usab.
