Mokabat sa 61 ka mga suspetsado, lakip ang duha ka Chinese nationals, ang nasikop sa gipakusog nga kampanya batok sa ilegal nga pagmina sa rehiyon sa Caraga niadtong Enero ug Pebrero.
Ang sunod-sunod nga operasyon gipahigayon sa Police Regional Office 13 (PRO-13) sa koordinasyon sa Department of Environment and Natural Resources (DENR-13).
Sumala ni Maj. Jennifer Omiter, hepe sa Public Information Office sa PRO-13, kabahin kini sa padayon nga kampanya sa PRO-13 ug DENR aron mapanalipdan ang kinaiyahan ug mapreserbar ang natural nga kahinguhaan sa rehiyon.
Gipasakaan na og kaso ang mga nadakpan tungod sa paglapas sa Republic Act No. 7942 o Philippine Mining Act of 1995.
Base sa datos nga gipagawas sa PRO-13, tulo ka anti-illegal mining operations sa Surigao del Sur miresulta sa pagdakop sa pito ka mga suspetsado, lakip ang duha ka langyaw. Sa Agusan del Norte, napulo ka mga indibidwal ang nasikop sa duha ka magkalain-laing operasyon.
Samtang sa Surigao del Norte, duha ka operasyon ang nagdala sa pagdakop sa 28 ka mga suspetsado, ug usa pa ka operasyon sa Agusan del Sur miresulta sa pag-aresto sa 16 ka mga indibidwal.
Sa usa ka pahayag, giingon ni Marcial Mariano Magistrado IV, regional director sa PRO-13, nga ang pagpanalipod sa kinaiyahan usa ka responsibilidad sa tanan. Matod pa niya, ang ilegal nga pagmina naghulga dili lamang sa natural nga kahinguhaan kondili usab sa kaluwasan ug panginabuhian sa mga komunidad.
Nanawagan usab siya sa tanang sektor nga magtinabangay aron mapreserbar ang bahandi sa kinaiyahan sa Caraga alang sa karon ug umaabot nga mga henerasyon.
Photo courtesy: PRO-13
