Personal nga mibisita sa probinsya sa Surigao del Sur si Bise Presidente Sara Duterte aron ipaabot ang moral nga suporta ug tabang sa mga residente nga grabeng naapektuhan sa Bagyong “Basyang.”
Sumala sa Bise Presidente, importante ang presensya sa gobyerno aron mapalig-on ang kadasig ug paglaum sa mga pamilya nga nawad-an ug panimalay ug panginabuhian tungod sa kalamidad. Giingon niya nga ang direktang pagbisita makatabang aron mas masabtan sa gobyerno ang kahimtang sa mga biktima ug ang ilang mga panginahanglan.
Atol sa iyang pagbisita, giadto ni VP Sara Duterte ang Brgy. Nurcia sa lungsod sa Lanuza, Brgy. Poblacion sa lungsod sa Cortes, ug Brgy. Maitum sa syudad sa Tandag, diin personal niyang nakig-istorya sa mga residente ug lokal nga opisyal.
Gipahimangnoan usab niya ang mga Surigaonon nga magpabiling alerto ug andam sa tanang panahon, ilabi na kay ang Surigao del Sur usa sa mga probinsya nga kanunay maagian sa mga bagyo.
Nagpasalig usab siya nga tabangan ang katawhan kutob sa iyang makaya aron makasugod ug makabangon ang Surigaonon.
