Gikatahong mipirma na sa kontrata sa Viva Artist Agency ang Kapuso actress-singer nga si Rita Daniela human sa kapin duha ka dekada nga pagpabilin sa GMA Artist Center.
Sumala sa mga balita sa showbiz circles, niabot og 21 ka tuig ang pag-atiman sa iyang karera ubos sa GMA Artist Center, diin nakaila siya isip usa sa mga versatile nga artista sa GMA Network. Sa sulod sa maong mga tuig, napamatud-an ni Rita ang iyang talento sa pag-arte ug pagkanta pinaagi sa nagkalain-laing teleserye ug musical projects.
Karon nga opisyal na siyang kabahin sa Viva Artist Agency, mas motubo ang posibilidad nga makita siya sa lain-laing mga proyekto gawas sa Kapuso network. Nagpasabot kini nga makatrabaho siya sa ubang estasyon ug makasulay og mas lapad nga oportunidad sa industriya sa showbiz.
Sa pagkakaron, wala pa’y opisyal nga pahayag si Rita kalabot sa iyang pagbalhin, apan daghan sa iyang mga tagasuporta ang nagpaabot sa sunod niyang lakang ubos sa bag-ong management.
Photo Courtesy: PEP.PH
