Gipahibalo sa AirAsia Philippines nga ang tanan nilang international flights mobalhin na ngadto sa Terminal 1 sa Ninoy Aquino International Airport (NAIA) sugod karong Marso 29, 2026. Kini nga lakang kabahin sa “terminal reassignment program” sa New NAIA Infrastructure Corporation (NNIC) nga nagtumong sa pagpausbaw ug pagpaanindot sa operasyon sa airport.
Tungod niini, ang check-in, boarding, ug baggage claim alang sa mga biyaheng gawas sa nasod anha na himuon sa NAIA Terminal 1. Gipahibalo usab sa AirAsia nga walay kausaban sa ilang mga flight schedule ug ang terminal assignment lamang ang nausab. Alang sa mga apektadong pasahero, magpadala og pahibalo ang airline pinaagi sa email ug SMS, apan mamahimo usab nga susihon ang detalye sa ilang flight status sa opisyal nga website sa AirAsia.
Samtang mobalhin ang mga international flights, ang tanang domestic flights sa AirAsia magpabilin gihapon nga mag-operate sa NAIA Terminal 2. Gawas sa AirAsia, gilauman usab nga adunay uban pang mga airline nga ipangbalhin og terminal isip kabahin niining maong bag-ong sistema sa airport.
Photo Courtesy:TTG Asia
