Isipon nga usa ka ordinaryong adlaw sa trabaho kon bahin sa suholan ug benepisyo ang paghandom sa anibersaryo sa EDSA People Power Revolution.
Sa gipagawas nga Labor Advisory No. 1 Series of 2026 sa Department of Labor and Employment (DOLE), gilatid ang saktong pagbayad sa suholan alang sa Pebrero 25, 2026, nga gideklarar nga Special (Working) Day subay sa Proclamation No. 1006.
Matod sa DOLE, ipatuman ang prinsipyong “no work, no pay” sa mga empleyado nga dili mosulod, gawas na lang kon adunay naglungtad nga mas paborableng polisiya sa kompanya, naandan nga buluhaton (practice), o collective bargaining agreement (CBA) nga naghatag og bayad bisan pa og special day.
Alang usab sa mga mosulod sa trabaho, madawat nila ang 100 porsiyento sa ilang suholan alang sa unang walo ka oras sa trabaho.
Samtang, alang sa trabaho nga molapas sa walo ka oras (overtime), kinahanglan bayran sa employer ang dugang nga 25 porsiyento sa hourly rate sa empleyado nianang adlawa.
Pahinumdom sa DOLE sa mga employer ug mga mamumuo nga sundon ang gitakda nga lagda aron malikayan ang bisan unsang paglapas sa labor standards.
Photo courtesy: Department of Labor and Employment – DOLE
