Nasikop ang tulo ka persona nga giingong nalambigit sa ilegal nga droga sa gilusad nga joint buy-bust operation sa mga otoridad alas 9:18 sa gabii niadtong Pebrero 22, 2026 sa Purok Nindot, Barangay San Jose, Digos City.
Giila ang mga nadakpan nga sila alyas “David,” 39-anyos ug giila nga High-Value Individual; alyas “Bambi,” 39-anyos; ug alyas “Bong,” 45-anyos nga parehong gikonsiderar nga Street-Level Individuals. Duha kanila residente sa maong barangay samtang ang usa gikan sa Barangay Zone 1, pawang sa Digos City.
Narekober sa operasyon ang upat ka heat-sealed plastic sachet nga adunay gituohang shabu nga may gibug-aton nga 10.52 gramos ug kantidad nga mokabat sa ₱71,536, lakip ang buy-bust money nga ₱1,200 ug lain-laing drug paraphernalia.
Sa pagkakaron, anaa sa kustodiya sa Digos City Police Station ang mga suspek samtang giandam ang kasong paglapas sa Republic Act 9165 o Comprehensive Dangerous Drugs Act of 2002.
