Gipasidunggan ang Mati City Police Station isip usa sa Best Police Station of the Week pinaagi sa usa Certificate of Recognition atol sa gipahigayon nga seremonyas niadtong Pebrero 23, 2026 didto sa Davao Oriental Police Provincial Office (DOPPO) Compound, Brgy. Dahican, Mati City, Davao Oriental.
Ang maong pasidungog gidawat ni PLTCOL Frederick C. Sa-ao, Acting Chief of Police, diin usa kini nga pag-ila sa aktibong kampanya sa estasyon batok sa kriminalidad. Nasayran nga ang Mati City Police Station nakarekord sa pinakataas nga ihap sa Simultaneous Anti-Criminality and Law Enforcement Operations (SACLEO) sulod sa miaging semana.
Kini nga lakang nagpakita sa kalig-on, panaghiusa, integridad ug sakripisyo sa tanang personahe sa Mati CPS sa ilang kampanya batok sa kriminalidad. Nagtimaan usab kini sa dedikasyon ug walay hunong nga paningkamot sa kapulisan sa pagmintinar sa kalinaw, kahapsay ug kaluwasan sa komunidad.
Samtang gipasalig sa Mati CPS ang ilang padayon nga pagserbisyo sa komunidad ug pagpanalipod sa katawhan alang sa mas malinawon ug mas luwas nga dakbayan sa Mati.
