Padayon ang programa sa Department of Social Welfare and Development o DSWD sa probinsya sa Zamboanga Sibugay, nga naghatag og tabang ug proteksyon sa mga batang minor de edad nga motravel.
Sumala sa DSWD Sibugay, gipakusgan nila ang ilang kampanya aron masiguro nga luwas ug protektado ang mga kabataan nga magbiyahe ilabi na kung mag-inusara o walay kauban nga ginikanan. Kini nga lakang kabahin sa pagpanalipod batok sa child trafficking, child labor, ug uban pang matang sa pang-abuso.
Gikinahanglan nga ang mga minor de edad nga mobiyahe, ilabi na kung dili kauban ang ginikanan, adunay travel clearance gikan sa DSWD. Ang maong dokumento maoy magpamatuod nga adunay pagtugot ang ginikanan o legal guardian sa pagbiyahe sa bata.
Nagpahinumdom usab ang ahensya sa mga ginikanan nga siguroon ang kompleto nga dokumento sama sa birth certificate, valid IDs, ug written consent aron malikayan ang problema sa pantalan o airport.
Nagpadayon ang DSWD sa pag-monitor sa mga terminal ug pantalan sa probinsya aron masuta ug mapugngan ang illegal recruitment ug pagpahimulos sa mga kabataan.
Sa mga ginikanan nga adunay plano nga pabiyahion ang ilang mga anak, gidasig sila nga moadto sa pinakaduol nga opisina sa DSWD aron makakuha og saktong giya ug impormasyon.
