Patay ang usa ka lalaking siklista human mabanggaan sa van niadtong nakalabay nga adlaw sa Digos City, ug hangtod karon pabiling wala pa kini maila.
Sumala sa Digos City Police Station, nahitabo ang insidente pasado alas-6:10 sa buntag sa Digos–Makar Road kanto Batangeño Village.
Ang Nissan Urvan nga adunay plakang LAB 9330 nga rehistrado ubos sa Holy Cross of Malita, Inc. maoy nakabangga sa biktima. Gimaneho kini sa 44-anyos nga drayber nga giila lang sa alyas “Ber.”
Sa inisyal nga imbestigasyon, nag “left turn” ang siklista paingon sa Batangeño Village ug didto nabanggaan sa van ang tuo nga bahin sa bisikleta sa biktima. Gidala dayon ang biktima sa Davao del Sur Provincial Hospital apan gideklarang dead on arrival.
Temporaryong gihuptan sa kapolisan ang drayber ug ang sakyanan samtang padayon ang imbestigasyon sa maong hitabo. Pabilin anaa sa Collado Funeral Homes sa Brgy Zone 1 Digos City ang lawas sa biktima.
