Padayon ang pagbantay ug pagpangandam sa kaluwasan sa publiko ang Davao Norte Police Provincial Office (DNPPO) tungod sa padayon nga pag-ulan sa probinsya nga dala sa shear line.
Sumala kang PCOL Glenn G. Cristines, Provincial Director sa DNPPO, gimando na niya ang tanang Chiefs of Police ug unit commanders nga hugot nga bantayan ang ilang mga area of responsibility, ilabina ang mga lugar nga prone sa baha ug landslide, aron masiguro ang kaluwasan sa mga residente.
Gipasiugda usab ni Cristines ang kahinungdanon sa lig-on nga koordinasyon sa mga Local Government Units (LGUs), MDRRMOs, ug uban pang ahensya aron masiguro ang paspas nga pagtubag ug husto nga pagpaabot sa impormasyon sa publiko.
Sa pagkakaron, gipahimutang na ang mga pulis sa nagkalain-laing dapit alang sa visibility patrols, pagbantay sa kahimtangan sa baha, pagdumala sa trapiko, ug pagtabang sa mga motorista ug pamilyang apektado sa dili maayong panahon.
Gibutang usab sa heightened alert status ang tanang yunit aron masiguro ang dali nga pagresponde sa bisan unsang emerhensiya nga mahimong mahitabo tungod sa padayon nga pag-ulan.
Nagpasalig ang DNPPO nga andam kini sa pagpanalipod sa kinabuhi ug kabtangan sa katawhan. Giawhag usab ang publiko nga magpabiling alerto, mosunod sa opisyal nga advisories, ug makigtambayayong sa mga otoridad aron masiguro ang kaluwasan sa tanan.
Photo : Davao Norte Police Provincial Office
