Gibisita sa Juander Radyo Kidapawan News Team, ang bag-ong buhatan sa Anti-Cyber Crime Unit sa probinsya sa Cotabato nga nahimutang sulod sa munisipyo sa Makilala, Cotabato kaniadtong adlaw’ng Biyernes Pebrero 20, 2026 aron hinabion si Chief Investigator Anti-Cyber Crime Unit Cotabato PSSg Rogelio Caparoso Jr. kabahin sa nahitabong pagparehistro sa daghan sim sa usa ka individual sa Midsayap Cotabato niadtong milabayng adlaw.
Matod pa niini nagmabungahon ang maong operasyon nga gipangunahan sa Cotabato Provincial Cyber Response Team pinaagi sa cyber patrolling nga miresulta sa pagkasikop ni alyas Rose, 38-anyos, residente sa Libungan sa nahisgtuang probinsya.
Kahinumduman nasikop ang babayeng suspek tungod sa paglapas sa Section 7 sa Republic Act No. 11934 kalabot sa Section 6 sa Republic Act No. 10175 o Cybercrime Prevention Act of 2012, human gimonitor sa cyber patrolling ang Facebook account nga namaligya og SIM cards online.
Narekober ang mga butang nga gilangkuban sa marked ug boodle money, usa ka DITO SIM nga maoy buy-bust item, 89 ka rehistradong DITO SIM card, ug usa ka Oppo N94 nga cellphone. Gikustodiya na sa kapulisan ang dinakpan alang sa tukmang disposisyon.
