Gibuhian pagbalik sa dagat sa Barangay Mamad, Baliguian, Zamboanga del Norte ang 69 ka mga critically endangered Hawksbill turtle hatclings niadtong milabayng adlaw nga gidumala sa Community Environment and Natural Resources Office (CENRO) Siocon.
Nakit-an sa mga residente ang maong mga bag-ong pusa nga pawikan diin dali usab nga gisusi sa mga personahe sa Conservation and Development Section ang report ug gipatuman ang pagpagawas subay sa mga protocol sa pagdumala sa wildlife.
Gihimo ang kalihukan uban sa koordinasyon sa barangay ug gisuportahan sa mga miyembro sa komunidad.
Ang Hawksbill turtle (Eretmochelys imbricata) nalista isip Critically Endangered ubos sa DENR Administrative Order No. 2019-09 ug sa International Union for Conservation of Nature (IUCN).
Giawhag sa CENRO Siocon ang publiko nga daling motaho ngadto sa ilang buhatan kung adunay madiskubrehan nga pugad sa mga pawikan sa kabaybayunan aron mahatagan ug tukmang pag-atiman.
Photo Courtesy: DENR Zamboanga Peninsula
