Arestado sa kapulisan ang usa ka 37-anyos nga lalaki kinsa adunay gihuptang daghang smuggled nga sigarilyo atol sa usa ka operasyon sa Brgy. San Miguel, Tagum City Davao del Norte, niadtong nakalabay nga adlaw.
Subay sa report, nagpatuman og joint anti-illegal cigarettes selling operation ang mga personahe sa Tagum City Police Station, Davao Norte Police Provincial Office, alayon sa Republic Act 10643 o ang Graphic Health Warning Law.
Ang maong operasyon miresulta sa pagdakop sa usa ka alyas Mic, 37-anyos, ulitawo, ug residente sa Purok 1, Brgy. La Filipina syudad sa Tagum. Samtang nasakpan ang suspek nga nagbaligya og smuggled nga sigarilyo. Dihang gipangitaan og legal nga dokumento o business permit gikan sa gobyerno ang suspek wala kini mapakita hinongdan nga kini giaresto.
Lakip sa mga nakumpiska nga ebidensya mao ang walo ka ream sa Millions Menthol cigarettes, upat ka ream ug usa ka pakete sa New Boss cigarettes, ug usa ka tinuod nga Php50 nga kwarta nga gigamit isip marked money.
Alayon niini, ang tanang nakuhang mga butang adunay gibana-banang kantidad nga Php12,050.00, samtang ang tanang nasakmit nga mga butang og ang suspetsado anaa na sa Tagum City Police Station alang sa hustong desposisyon.
Photo Courtesy : MSN
