Gikompirma ni Allen Estabillio, Focal Person sa National Commission for Senior Citizen Cluster 7, nga daghan na kaayong senior citizens ang nakadawat sa cash gift, base sa ilang mga edad nga alayon sa Expanded Centenarians Act. Sumala ni Estabillo, kapin ₱96 milyon na ang narelease gikan sa maong buhatan nga nagsugod niadtong Pebrero 2025 hangtod Disyembre 2025, diin 9,210 ka mga benepisyaryo nga senior citizens ang nakadawat sa cash gift.
Giklaro usab niya nga wala’y kaltas sa mga cash gift, supak sa mga hungihong nga dunay gipa-kaltas nga porsyente sa ilang gipang-release. Dugang sa opisyal nga dili kini ayuda gikan sa gobyerno apan usa ka regalo para sa mga senior citizen nga moabot sa 80, 85, 90, 95 ug 100 anyos.
Ang Expanded Centenarians Act usa ka balaod sa Pilipinas nga naghatag og cash gift sa mga tigulang nga Pilipino sa lain-laing edad. Dili lang sa mga 100 anyos kini, apan apil na ang mga moabot og 80, 85, 90, ug 95 anyos. Ang matag milestone nga edad makadawat og ₱10,000, samtang ang mga centenarians nga moabot og 100 anyos makadawat og ₱100,000 ug letter gikan mismo sa Presidente. Ang balaod gipatuman aron maila ug pasidunggan ang mga tigulang ug matabangan sila sa ilang panginahanglan samtang buhi pa.
Photo Courtesy: Allan Cuizon
