Patay ang usa ka lalaki human gipusil sa Perez Subdivision, Barangay San Isidro, General Santos City kagahapong adlawa, Pebrero 12, 2026 taknang alas 11 sa buntag. Ang biktima nailhan nga si John Mark Bacos, 31-anyos, officer in charge sa usa ka motorcycle dealership ug residente sa Barangay Apopong.
Sumala sa imbestigasyon sa kapulisan, nagmeryenda si Bacos sa usa ka tindahan sa lugar sa dihang kalit siya gipusil sa ulo ug dughan sa wala mailhing suspetsado. Dali nga miresponde ang kapulisan ug gisulayan pa siyang dalhon sa balay-tambalanan, apan gideklarar nga dead on arrival sa pag-abot sa ospital.
Padayon pang gisuta sa mga awtoridad ang motibo sa pamusil ug ang identidad sa responsable. Ang kapulisan nag-awhag sa publiko nga maghatag og impormasyon kon adunay nahibal-an nga makatabang sa imbestigasyon.
Kahibaloan nga kini na ang ika-upat nga shooting incident nga nahitabo sa dakbayan sa General Santos karong Pebrero 2026.
