Nadakpan sa kapulisan ang usa ka drug suspek atol sa gipahigayong buy-bust operation alas 12:10 sa kaadlawon niadtong Pebrero 10, 2026 sa Purok 8, Barangay Poblacion, Sulop, Davao del Sur.
Gipangunahan sa Municipal Drug Enforcement Unit sa Sulop Police Station, uban sa Provincial Intelligence Unit sa DSPPO, 1104th Maneuver Company ug 1st DSPMFC, ang operasyon nga adunay koordinasyon sa PDEA ubos sa Control No. 12-00-02092026-044.
Ang nadakpan giila nga si alyas “JHON-JHON,” 31-anyos, vendor ug residente sa maong lugar, nga giklasipikar isip Non-Index Person o Street-Level Individual.
Nakumpiska gikan kaniya ang gituohang shabu nga mokabat og 0.42 gramos nga adunay standard drug price nga Php2,856. Gihimo dayon ang pagmarka ug imbentaryo sa mga ebidensya atubangan sa suspek ug mga saksi subay sa balaod.
Kasamtangang anaa na sa kustodiya sa pulis ang dinakpan ug giandam na ang kasong paglapas sa Republic Act 9165 o Comprehensive Dangerous Drugs Act of 2002.
Padayon ang Sulop PNP sa pagpakusog sa kampanya batok ilegal nga droga aron maseguro ang kalinaw ug kaluwasan sa katawhan.
