Mipahigayon og programa ang Department of Science and Technology o DOST–Zamboanga Sibugay nga gitumong sa pagpalig-on sa mga Micro, Small, and Medium Enterprises o MSMEs sa probinsya. Tumong sa maong kalihokan ang paghatag og teknikal nga tabang, modernong teknolohiya, ug dugang kahibalo aron mapauswag ang produksyon ug kompetisyon sa lokal nga mga negosyo.
Sa maong programa, gipaila sa DOST ang lain-laing mga serbisyo sama sa packaging ug labeling assistance, product testing, ug paghatag og gamit pinaagi sa Shared Service Facilities. Matod pa sa ahensya, dako ang tabang niini aron mapataas ang kalidad sa produkto ug mas makasulod ang MSMEs sa mas halapad nga merkado.
Mipahayag usab og pasalamat ang pipila ka benepisyaryo sa programa, ilabi na ang mga gagmay’ng negosyante nga nakasinati og kalisod sa produksyon ug marketing. Sumala nila, dako ang papel sa DOST sa paghatag og kahigayonan nga mapalambo ang ilang negosyo gamit ang siyensya ug teknolohiya.
Samtang nagpadayon ang programa, nanawagan ang DOST–Sibugay sa ubang MSMEs nga magpahibalo ug moapil sa ilang mga proyekto. Gilauman nga pinaagi sa maong inisyatiba, mas mudaghan pa ang lig-on nga negosyo sa probinsya ug makatabang sa pagpalambo sa lokal nga ekonomiya.
Photo Courtesy:Twitter
