Mipagawas og pamahayag si Talisay City Mayor Gerald Anthony Samsam Gullas mahitungod sa nikatap sa social media diin nakita sa video ang mga tinun-an nga nihimo og maagian sa Camp 4.
Matod ni Mayor Samsam nga dali kining gipaabot ngadto kang Bgy. Camp 4 Kapitan Rowena Edar aron mahatagan og katin-awan ang maong video.
Mipasabot ang kapitan nga giagian sa mga tinun-an, dili angay nga agian. Aduna kini hanging bridge niadto apan matod pa nga nabanlas kini tungod sa pag-igo sa bagyong Tino.
Segon sa kapitan nga ang maong bata gikan sa tunghaan ug tungod sa kusog nga bunok sa uwan, midako ang tubig sa sapa ug nipili ang mga ginikanan nga didto nalang moagi sa pangpang nga nagviral sa video aron nga malikay sa tubig sapa sa ilang pag-uli.
Gihatagan sab og direktiba ang barangay nga tabangan ang mga residente sa mga pamaagi kung adunay susama nga panghitabo nga dili makalabang sa sapa apan giklaro sa mayor nga kinahanglan dili na sila moagi balik sa maong pathway nga gisubay sa mga bata.
Giuyonan sab kini sa kapitan ug gani nagpadala kini og mga tanod sa maong dapit aron sa pagmonitor nga dili maagian ang maong pangpang gumikan sa kadelikado niini.
