Misaka ang rekord sa ₱12.68 trilyon ang trading volume sa government bonds sa Pilipinas niadtong 2025, sumala sa Bureau of the Treasury (BTr), nga nagpakita sa mas kusog nga kalihokan sa secondary market, mas maayong liquidity, ug mas taas nga pagsalig sa mga mamumuhunan.
Base sa datos sa BTr, dako kaayo ang nisaka sa trading volume kon itandi sa ₱2.98 trilyon niadtong 2022, nga giisip nga pinakagamay human sa pandemya. Giingon sa BTr nga ang pagtubo sa merkado tungod sa regular nga pag-isyu sa Treasury bills ug bonds, lakip ang mga estratehiya sa paghimo og benchmark securities ug paghiusa sa parehas nga mga isyu.
Matod ni National Treasurer Sharon Almanza, ang kalig-on nga makita sa secondary market mao ang klarong ebidensya nga epektibo ang dugay nang estratehiya sa gobyerno sa pagpalalom sa government securities market aron mahimong mas liquid, transparent, ug lig-on.
Niadtong 2025, miabot sa 1.05 ang turnover ratio sa government securities, nga nagpasabot nga mas kanunay na gibaligya ug gipalit ang mga bond sulod sa usa ka tuig. Mas aktibo usab ang trading sa 5-year, 7-year, ug 10-year bonds kumpara sa miaging mga tuig.
Misaka usab ang kalihokan sa Retail Treasury Bonds (RTBs), nga gitumong sa ordinaryong mamumuhunan, diin miabot sa 2.4 ang turnover ratio sa 2025. Samtang, misaka ang interes sa mga langyaw nga investors nga hapit 5 porsyento gikan sa 2 porsyento niadtong 2023.
Tungod sa maong kalamboan, mas duol na ang Pilipinas sa pag-apil sa JP Morgan Government Bond Index–Emerging Markets, usa sa labing impluwensyal nga bond indices sa kalibutan.
Samtang niini, miabot usab sa bag-ong rekord nga ₱17.71 trilyon ang outstanding debt sa nasud sa katapusan sa Disyembre 2025.
Photo Courtesy:Bureau of the Treasury
