Mokabat sa Php3.3 milyones ang kantidad sa mga smuggled nga mga sigarilyo ang nakumpiska sa kapulisan sa gipahigayon nga entrapment operation sa Purok Gumamela, Barangay Camanga, Tukuran, Zamboanga del Sur, niadtong nakalabay nga adlaw.
Nanguna sa operasyon ang mga personahe sa ZSPIU, RID9 (RA-ZDS), 902nd MC, RMFB9, Maritime Police Station-ZDS, ug Tukuran Municipal Police Station, sa koordinasyon sa Tukuran Health Office nga miresulta sa pagkasikop sa 26-anyos nga laborer ug residente sa Zamboanga City.
Nalakip sa nakumpiska ang mga master cases sa lain-laing mga brand sa sigarilyo, usa ka marked money Php1,000.00 bill , ug 599 ka piraso sa Php1,000.00 nga boddle money.
Sumatotal mokabat sa Php3,323,400.00 ang kinatibuk-ang na recover nga mga ebidensya sa operatiba nga gidala na dayon ngadto sa Tukuran Municipal Police Station alang sa tukmang disposasyon.
Gikatakda usab nga atubangon sa suspetsado ang kasong paglapas sa Republic Act 10643 (Graphic Health Warning Signs Law) ug Republic Act 8424 (Tax Reform Code of 1997) nga gi-andam na sa korte.
Photo Courtesy: PD ZSPPO, PRO 9
