Landig sa Balay tambalanan ang Duha ka batan-ong lalaki human kini nakaangkon og samad pinusilan, alas 2:30 sa kadlawon, niadtong nakalabay nga adlaw, sa Central Place Bar and KTV, Borromeo Street, Barangay Taft, Surigao City.
Sa impormasyon ni PLTCOL ATTY. Mariano C Lukban, Hepe sa Surigao Component City Police Station, giila ang mga biktima nga sila Bryan Yumontod Bangali, 22-anyos, laborer ug residente sa Purok 7, Brgy. Escalon, Surigao City; ug Bemark Toraja Alce, 20-anyos, construction worker ug residente sa Purok 8, Brgy. Capalayan, sa dakbayan.
Sa imbestigasyon, naglalis ang biktima ug ang suspek gawas sa bar dihang kalit nga gipusil sa suspek. Si Bangali naigo sa iyang wala nga paa, samtang si Alce naigo sa wala nga abaga.
Human sa insidente, daling misibat ang suspek sakay sa color itom nga traysikel nga walay body number. Sa follow-up operation sa kapulisan, narekober sa crime scene ang basiyo sa bala sa caliber .45 nga armas.
Daling nadakpan ang suspek ug nailhan kini sa pangalan nga Marvin Daan Estampa, residente sa Brgy. Mabini, Surigao City.
Gidala na sa Regional Hospital ang mga biktima aron matambalan. Samtang gikustodiya na sa Surigao City Police Station ang suspek alang sa tukmang disposasyon.
