Gipat na sa Tropical Cyclone Wind Signal (TCWS) No. 2 ang probinsya sa Surigao del Sur tungod sa paglig-on sa bagyong “Basyang,” sumala sa pinakabag-ong pahibalo sa Philippine Atmospheric, Geophysical and Astronomical Services Administration (PAGASA).
Sa report sa PAGASA, ang sentro sa bagyo namatikdan sa 560 kilometros silangan sa Hinatuan, Surigao del Sur. Nagdala kini og kusog sa hangin nga moabot sa 65 kilometros matag oras ug pagbugso hangtod 80 kph, hinungdan sa mas kusog nga ulan ug hangin sa mga lugar nga sakop sa signal.
Tungod sa Signal No. 2, posible ang kusog nga hangin nga makadaot sa mga balay ug tanom, ingon man ang padayon nga pag-ulan nga makapahinabo og pagbaha ug landslide, ilabi na sa mga kabukiran ug ubos nga lugar sa probinsya.
Samtang, ubos sa Tropical Cyclone Wind Signal No. 1 ang ubang lugar sa Caraga, Eastern Visayas, ug amihanang Mindanao nga posibleng maapektuhan sa outer rainbands sa bagyo.
Gilauman nga mag-landfall ang Bagyong Basyang sa amihanang bahin sa Mindanao sa Huwebes sa gabii hangtod Biyernes sa buntag, ug posibleng motabok paingon sa Palawan sa mga mosunod nga adlaw.
Giawhag sa mga otoridad ang publiko, ilabi na sa Surigao del Sur, nga magpabiling alerto, mag-andam sa posibleng evacuation kung gikinahanglan, ug padayon nga mosunod sa mga pahimangno sa lokal nga pangagamhanan ug disaster response agencies.
Photo courtesy: DOST- PAGASA
