Makadawat ug dugang nga mga benepisyo gikan sa Philippine Health Insurance Corp. (PhilHealth) ang mga middle-income contributor. Matod ni Health Secretary Ted Herbosa, ang katuyuan sa bag-o nga inisyatiba mao ang paghatag sa mas maayo nga benepisyo sa mga miyembro sa PhilHealth nga direkta nga nagabayad sa ilang mga premium gikan sa ilang sweldo o income sa negosyo.
Subay usab kini sa gibarugan ni Presidente Ferdinand Marcos Jr. alang sa panginahanglan sa pagsuporta sa mga direktang contributors. Lakip sa gikonsiderar sa ahensya mao ang pag-upgrade sa mga serbisyo sa ospital.
Matod ni Sec. Herbosa, siya ug si Executive Secretary Ralph Recto naghisgot sa posibleng probisyon sa mas maayong serbisyo alang sa mga direktang miyembro.
Sa pagkakaron, ang tanang miyembro gihatagan og basic accommodation, maong matod niya posible nga mahimo nga ipatuman nga duha ka pasyente sa matag lawak o dugangan og air conditioning aron ang mga miyembro makatagamtam og mas maayong benepisyo.
Laing rekomendasyon matod pa niya mao ang extension sa PhilHealth packages alang sa mga ospital nga nag-implementar sa zero-balance billing program.
Matod niya nga tun-an kini sa iyang team kon masustiner ba kini sa Philhealth, bisan pa man nga andam silang mobayad og dakong kantidad sa mga tambalanan nga moabot ngadto sa Php300 bilyones ug posibleng dugangan kini karong tuiga.
Namahayag ang tigpamaba sa PhilHealth nga si Dr. Israel Francis Pargas nga ang mga benepisyo sa Philhealth magamit sa tanang miyembro, apil na kadtong walay bayad sa premium.
Photo Courtesy: Rappler
