Patay ang upat ka indibidwal sa pagpamusil sa Sitio Israel, New Abra, Matalam, Cotabato, niadtong nakalabay nga gabie.
Sa taho sa Matalam Municipal Police Station, giila ang mga biktima nga sila Rashid Sahay Mampo, 20-anyos, Rica Jane Maidlos, 16-anyos, Daryl Mampo Diansay, 12-anyos ug Russel Kim Mampo Diansay, 11-anyos. Samtang, anaa usab matod pa sa kritikal nga kondisyon si Ebrahim Mampo Lamalan, 14-anyos.
Sa imbestigasyon sa kapulisan, mopauli na unta ang mga biktima sa ilang balay human nikonektar sa WiFi sa pinuy-anan ni Eddie Belandres dihang kalit silang gipamusil sa wala mailhing mga armadong suspek gamit ang wala matinong kalibre sa armas nga maoy hinungdan sa ilang kamatayon. Dali usab nga nisibat ang mga suspek human sa insidente.
Sa karon, padayon pa ang ginahimong imbestigasyon sa Matalam PNP, aron masuta ang motibo sa pagpamusil lakip na ang posibleng pag-ila sa mga suspek.
