Padayon sa gihapon ang hugot nga imbestigasyon sa kapulisan sa Mawab, Davao de Oro, human sa insidente sa pagpamusil nga nahitabo sa Mawab National Highway nga nisangko sa pagkamatay sa usa ka pahenante sa trak niadtong Enero 27, 2026.
Gibisitahan sa Juander Radyo News Team ang Mawab Municipal Police Station aron masayran ang dugang detalye sa maong panghitabo. Sa pakighinabi kang PMAJ June Eric B. Deguito, Chief of Police sa Mawab Municipal Police Station, iyang gipahayag nga dali ang ilang pagresponde sa insidente tungod kay nagpahigayon og regular nga patrol ang kapulisan diha sa national highway sa dihang nadawat ang report mahitungod sa maong pagpamusil.
Dugang pa ni PMAJ Deguito, nagpahimangno ug nagpahugot siya sa kasigurohan sa katawhan, ilabi na sa mga motorista nga moagi sa lungsod sa Mawab, nga wala’y angay ikabalaka tungod kay ang nahitabo usa lamang ka isolated case.
Padayon usab, matod pa niya, ang paningkamot sa kapulisan sa pagmintinar sa kalinaw ug kahapsay sa munisipalidad sa Mawab, Davao de Oro.
