Nanguna si DA Secretary Francisco Tiu Laurel Jr. sa alokasyon nga ₱76.1 milyon nga kantidad sa mga proyekto sa sektor sa agrikultura ug pangisdaan para sa probinsya sa Aklan.
Kini nga pundo nagtumong sa pagpalig-on ug pagpauswag sa kahimtang sa panginabuhi sa mga lokal nga mag-uuma ug mangingisda sa rehiyon.
Kun asa ang nag-unang katuyoan niini nga mga proyekto mao ang paghatag kanila sa modernong teknolohiya ug kagamitan nga gikinahanglan aron madugangan ang ilang produksiyon ug kita.
Kini nga inisyatiba subay sa direktiba ni Presidente Marcos Jr. aron masiguro ang food security sa tibuok nasud.
Pinaagi sa paghatag og suporta sa mga mag-uuma ug mangingisda, ang DA nagtumong sa pagpalig-on sa lokal nga produksiyon sa pagkaon ug pagpakunhod sa pagsalig sa mga imported nga produkto.
Lakip sa mga hinabang nga gipang-apud-apod mao ang mga traktora alang sa kalamboan sa panguma, mga harvester para sa mas paspas ug mas episyente nga pag ani, insurance indemnity checks aron maprotektahan ang mga mag-uuma batok sa kapildihan tungod sa mga kalamidad, ug fiberglass boats alang sa mga mangingisda.
