Gipasiugda sa Regional Anti-Cybercrime Units (RACU) sa PNP Anti-Cybercrime Group (ACG) ang ilang papel sa pagpanalipod sa publiko batok sa nagkadaghan nga krimen nga ginahimo pinaagi sa internet ug modernong teknolohiya.
Matod ni Police Captain Maria Nemelynd C. Encabo, Team Leader sa SA CYBER RESPONSE TEAM PNP ANTI-CYBERCRIME GROUP – Iligan and Lanao Del Norte-ang ilang buhatan nakatutok sa pagsikop ug pag-imbestigar sa nagkalain-laing porma sa cybercrime, lakip na ang online fraud o scams, cyber libel, pishing ug uban pang krimen nga gihimo pinaagi sa Information and Communications Technology (ICT).
Gipasabot ni PCPT. Encabo nga ang mga operasyon sa RACU-ACG nakabase sa Republic Act No. 10175 o Cybercrime Prevention Act of 2012, nga nagmando sa Philippine National Police ug uban pang law enforcement agencies sa pag-imbestigar ug pagprosecute sa tanang matang sa cybercrime cases.
Dugang pa niya, ang PNP Anti-Cybercrime Group adunay mga digital forensic teams nga espesyalista sa pag-recover, pag-analisa, ug pagpreserba sa ebidensya gikan sa mga computer, mobile phone, ug uban pang electronic devices nga gigamit sa paghimo sa krimen.
Atol sa pakighinabi sa Juander Radyo News team, hugot nga gipahimangnuan sa RACU-ACG ang publiko nga magbantay ug dili dayon motuo sa mga text messages, tawag, o online messages gikan sa mga dili kaila nga indibidwal.
Gipasidan-an usab ang katawhan nga dili basta-basta mohatag sa personal ug sensitibong impormasyon, tungod kay kini mahimong gamiton sa mga scammer aron makapanglimbong ug makapanikas sa ilang mga biktima.
Gipasiugda sa PNP nga ang kahibalo, pagmatngon, ug kooperasyon sa publiko maoy dakong tabang sa pakigbatok sa cybercrime.
